انا والزهايّمر

انا ... والزهايّمر
بمناسبة عرض اعلانات الفلم الجديد لعادل امام الزهايمر وبشكل مُستمر ذكرني بمرض الزهايّمر وخاصة انه اصبح من امراض العصر وكثير من المشاهير مُصابين به وصار يعملوا له جمعيات وهيئات مُساعدة ومُساندة للمصابين به بس المُشكله ما حدش فكر باللي زيّيي وبعانوا من مرض الانتيزهايّمر.
مرضي انا وعن جد مش مزح هو (نشاط غير عادي) للذاكرة ويؤدي الى مُضاعفات منها زيادة نبض القلب (نشاط غير عادي)  وضغط على الجهاز العصبي (نشاط غير عادي) وهذا تطلب من حوالي 7 سنين بعد تشخيص الحالة في مُستشفيّات عالميّة غير محليّة ان اتعاطى دواءا اجنبيّاً معينا يساعدني على عمل مسح لبعض الملفات من الذاكرة يعني بالعربي ديليت من الميموري لانه الميموري فُل وعشرة على راي اخواننا المصريّين والمشكلة انه بعد 7 سنوات من الاستمرار على الدواء وبشكل يومي ومستمر ما في نتيجة والذاكرة زي ما هيّ مليّانة بالعربي فُل على الاخر والسبب على ما اعتقد انه الدواء ولو انه من شركة عالميّة ومعروفة واكيد مجرب ومضمونه نتائجة بس نسيّوا يجربوا علينا العرب قبل ما يصدروا لنا ويطبعوا على قفا الديسكربيشن بالعربي ولو كان جربوه علينا لسحبوه فوراً من الاسواق لانه ما فيش ولا دواء في الدنيا ممكن يلغي ملفات المُعاناة والنكد والقهر اليومي من ذاكرة المواطن العربيّ. 
الله يرحمك يا بويّ كنت تقول نقطة نقطة بيتعبى السطل واذا ما فضيناه بيّفيض وبيّكب الزيادة غصب ....طلع بيقصدني انا بالسطل وانا مش عارف.....


يوسف