التسميات

الثلاثاء، يونيو 14، 2011

لحظة الحقيقة >>> moment of truth


المتاجرة في اسرار البشر وامام اعز الناس من اجل حفنة من الدولارات هو المعنى الحقيقي لهذا البرنامج التلفزيوني.

تابعت حلقة من النسخة الاجنبية ولم اجد نفسي مضطرا بعدها لمشاهدة البرنامج الذي يتعمد جرح المشاعر الشخصية للاخرين وامامهم ...اما وقد اصبحنا الان امام النسخة العربية فاعتقد ان الموضوع اصبح اكثر اهمية ويحتاج الى موقف...
هل يحق لنا ان نُحضر معنا اقرب الناس لنا ونجرحهم امام الجمهور وامام ملايين المشاهدين من اجل ان نحظى بمبلغ من المال مهما كانت قيمته ... هذا اذا حظينا ... وتحت شعار مزيف هو الحقيقة... ايُّ حقيقة تلك التي تعطينا الحق ان نجرحهم مقابل ان نكسب الفلوس.
سافترض نفسي هنا مُشاركاً في البرنامج وجالساً على كرسي الاعتراف ومعي والدتي الحجة وزوجتي ام عمر ...وسافترض هذه الاسئلة وجهت لي.....

خلال زواجك ... هل شعرت يوما بالندم من زواجك من ام عمر
الجواب....... نعم
الاجابة صحيحة
الجمهور يصفق ....واو ... كبيرة
المقدم يبتسم ويثني على شجاعتي وصراحتي
ام عمر تُبدي امتعاضها
الحجة تبتسم من تحت ... لتحت وُتتمتم ...انت اللي جبته لحالك
طيب ليش...لو انتِ يا ام عمر كنتِِ مكاني....
اقول لكم هنا انتم اصدقائي وصديقاتي المتزوجين والمتزوجات لو كنتم مكاني
ماذا كان جوابكم...

هل تشعر ان الاقرب الى والدتك هو الاكثر سخاءاً عليها؟
ينقلب المشهد
ام عمر تنشكح قليلا 
والحجة تنتظر الاجابة وسط ذهول شديد
نعم
الاجابة......صحيحة
ام عمر والجمهور ...تصفيق
الحجة تدير وجهها على الشمال وتُتمتم
ليش هيّ هايّ مصاري اللي بيعطوني اياها
الحجة الله يطول في عمرها دخلها الشهري حوالي الف دينار من تقاعدين عسكري ومدني ومن دعم اولادها وبناتها عدا المناسبات وما اكثرها



هل زوجتك هيّ اول حب في حياتك؟
انا تزوجت وعمري 32 سنة ...
شو كنت بلعب جلول طول هالسنين
طبعا ابتسامة الحجة عادت الى وجهها 
وام عمر بتمتم....عادي الرجال كلهم هيك قبل ان اجاوب 
لا
صحيحة

هل والدتك بتنتقد زوجتك وزوجات اخوانك وازواج اخواتك امامك؟
ليش هي والدتي مش حماتهم....ومش عاجبها الا اولادها وبناتها بس
نعم
صحيحة
الحجة طبعا مش مصدقة وكأني بتبلى عليها
وام عمر استعادت التعادل من جديد


هل والدتك كانت موافقة على زواجك من ام عمر؟
الحجة بتمتم لحد هلأ مش موافقة
لا
صحيحة

هل فكرت يوما بالزواج مرة ثانيّة؟
صحيح انه ضربتين بالراس بيوجعوا بس بما انه السؤال هل فكرت ....لازم افكر مزبوط قبل الجواب
خلال ذلك ام عمر تظهر وكأنها تنتظر الجواب على احر من الجمر وكأنها لا تعلم ولم تكن تدفعني الى ذلك لولا انني استعدت عقلي بسرعة وقبل ان يتحول الموضوع الى اكثر من فكرة ....الحجة مرتاحة لانها عارفة الجواب
نعم
صحيحة
واو....ذهول والحجة تصفق مع الجمهور


هل انت زوج مثالي؟
هذا الجواب الوحيد اللي زوجتي رح تجاوبه قبلي وبالنيابة عني 
لا
صحيحة 
ام عمر مبسوطة ومنعنشة والحجة مش عاجبها وبتمتم والله اولادي ما في زيّهم ...هو بس حظهم اللي طلع ناقص

هل تمارس دور الزوج الشرقي التقليدي في بيتك سي السيد؟
طبعا اذا قلت لا رح يقولوا عني خرونج ... والحجة رح تزعل مني وتقول يا فضيحتنا قدام الجيران...مرته حاكمته
ملعون ابوها المصاري...
 نعم
الاجابة....................خاطئة


هوهو......صمت....ذهول

راحوا المصاري وتبهدلنا وبالاخر طلعت قدام اهلي والجيران 
خرونج ومش مايّن على مرتي ومش قادر اكون سي السيّد واكون الآمر الناهي في البيت والحجة زعلت مني ومتضايقة وممكن تغلق الحدود وتسحب السفراء...
والله وتبهدلت على كبر يا ابو عمر

يوسف
14/06/2011






هناك 24 تعليقًا:

  1. يعني مش طبيعي :)
    قاعده بتخيل الصورة شي بيضحك:)
    هلا البرامج هاي حتى في امريكا مش مرغوبه والناس الفاضيه بتشوفها ! انا باعتبرها أهانه للطرفين وشيء مخزي تشوفها في العالم العربي بس هاد اللي فالحين فيه فش اسهل من النسخ

    ردحذف
  2. بس مبارح حضرته بالفيرجن العربي وكنت حاضريته بالامريكي وقتها حكيت مستحيل يعملوه بالعربي ويرضى حد يشارك فيه اصلا ... لسه عنا التقليد الاعمى .... الله يشفينا

    ردحذف
  3. سأستعير المصطلح المتداول "تحشيييييييش" على قد ما ضحكت ....الله يبعتلك الهنا والسعاده ويبعد عنك البهدله.

    البرنامج بنسخته الاجنبيه كان مقبول وتابعت عدة حلقات منه لكن النسخه العربيه باين عليها مشرشحه من الدعايات...فاختصرت سمات البدن!

    اكيد المليون ما بتسوى البهدله والكسفه والاحراج قدام الخلايق لكن انا بقول انه اللي عنده استعداد يروح ويتبهدل ويبهدل اعز الناس عليه بهالطريقه بيحسبها بطريقه تانيه ....بيقول لحاله اذا كسبت المليون اكيد مرتي بتسامحني وامي بتسامحني واصدقائي بيسامحوني ....مليونير يا عمي واللي مش عاجبه الباب بيفوت جمل!
    بس هم الحق عليهم ابو عمر....ليش يطاوعوك وييجوا معك اساساً؟....الا اذا فيها محاصصه الشغله؟ ههههههههههههههههههههه

    ردحذف
  4. سوزان
    صباح الخير

    هذا المجال الوحيد الذي نبدع فيه ....التقليد الاعمى للغرب ...ويا ريت الاشباء الكويسة اللي بالغرب بننقلها وبنقلدها ...على العكس تماما الاشياء التي حتى الغرب ينفر منها نحن نفتخر باننا نقدمها هنا مع ادراكنا لاثرها السلبي على مجتمعنا

    دمتِ بخير ابنتي
    والله يرضى عليكِ ويسعدك

    ردحذف
  5. ابو عمر

    اول مرة بنديلك بأوبو عمر ما بعرف ليش

    بس جد حلقة تمام

    فضيحة على الملأ + زعل إم عمر+ زعل الحجة + خسارة الفلوس

    جد بهدلة

    عم بتخيل الحلقة وانا عم بحضرها من هون

    نصيحة خلي مشاركتك كمان مجرد فكرة

    اوعك توصلها مرحلة التطبيق

    ردحذف
  6. سمسم

    صباح الخير
    كيفك؟
    ان شاء الله بخير

    اتضح لي بعذ هذا العمر ان كل شيء وارد في مجتمعنا طالما الفلوس موجودة وطالما هناك من يصرف وهناك من هو محتاج لتلك الفلوس حتى لو لشراء كماليات ومنظرة اجتماعية....يعني ليس بالضرورة ان يكون محتاج بل على العكس الاكثر حاجة الاكثر تمسكا بالاخلاقيات والقيم ...
    دمتِ بخير
    والله يرضى عليكِ ويسعدك

    ردحذف
  7. زينة الصبايا
    صباح الفل والياسمين

    هي محاولة مني للتفكير بصوت عالي عن ماذا سيحدث لو شاركت افتراضيا في البرنامج ....
    الحقيقة انني لو شاركت...وعمري ما رح اعملها...ساخسر من اول سؤال فلن اسمح لنفسي ان اضايق اي انسان كان من يكون حتى لو كان ضايقني طول عمري ...مقابل مال الدنيا

    علي سيرة الفكرة
    انا احببت اختار اسئلة منطقية في الطرح وواقعية
    انا متزوج من 25 سنة
    هل تعتقدين انني لم اشعر يوما للحظة بالندم
    عادي جدا ان تمر علينا لحظات نشعر بها بالندم
    الا تعتقدين اننا لم نمر يوما بلحظات قالت لي ام عمر منشان الله روح تزوج مرة ثانية وحل عنا

    كل ما ذكرته حصل في لحظة ما في بيتي وسمعته من قبل في بيت والدي وسمعته دائما في بيوت من ازورهم او من خلال حواري معهم

    لا تخافي عليّ ...مشاركاتي محدودة في برامج الواقع
    كلها تنحصر في وجودي في برنامج الواقع الفلسطيني منذ اكثر من 40 عاما

    دمتِ بخير ابنتي
    والله يرضى عليكِ ويسعدك

    ردحذف
  8. نيسان
    صباح الفل والياسمين

    النسخة الاجنبية مقبولة لاننا نتوقع من الاجانب كل شيء واي شيء
    من نوع مثلا
    هل اقمتِ علاقة مع صديقك القديم بعد زواجك؟
    الجواب
    نعم
    الاجابة
    صحيحة
    تصفيق حاد من الجمهور
    ابتسامة عادية من الزوج

    او اعكسي الصورة هو بدلا من هي

    ما قصدته ان المجتمع هناك يتقبل كل الاجابات مقابل كل الاسئلة
    ولكن بما اننا لا يمكن ان نُسأل اسئلة محرجة على طريقة النسخة الاجنبية فالخيار الوحيد ان تكون اسئلتنا محرجة شخصيا لمن هم معنا يشاركون الحضور وعادة هم الاقرب
    واكيد اللي جايين معنا طمعانين في الغنايم ومش عارفين شو اللي مستنيهم
    هم مفكرين مشوار نص ساعة زمن وكم سؤال ونص مليون
    محدش غلب........!!!

    دمتِ بخير
    والله يرضى عليكِ ويسعدك
    المهم الكل ضحك وانبسط
    وهو بيتفرج على الحلقة الخاصة جدا
    لانها ما رح تنعاد

    ردحذف
  9. المقدم يثني على شجاعة المتسابق "المتحامق؟" .. لا و كمان أزيدك من الشعر بيت ... أهله و صحابو بيهنوه على صراحته بعد الحلقة و بيحتفلوا!

    ردحذف
  10. هذا البرنامج لازم يكون عنا اسموا.....خراب بيوت وستات بتنجلط وتموت .....ويا عمي في هذا الزمن بطل حد يسجل بذاكرتوا اي شي والناس صارت تنسى خاصه إزا فيها مصاري
    بس الي بين بين وأشتركت بالبرنامج وبدون لا مصاري ولا فلوس ولا شهرة حتى
    عالسكيت
    بالنسبه الي لو أشترك في البرنامج بطلع متل مصيف أريحا
    خليها مستوره أبو عمر
    خلوووود

    ردحذف
  11. اخي هيثم

    مساء الخير

    اكيد لازم يعملوله حفلة وطنة ورنة

    مش رفع راسهم لفوق

    وممكن كمان شوية طخطخة والعاب نارية ومفرقعات

    هيّ قليلة الفضيحة ام جلاجل

    دمت بخير

    ردحذف
  12. خلووود

    مساء الخير
    والله يرضى عليكِ ويسعدك

    صحيح ...معك حق
    بس المشكلة في ناس عم بتشارك
    ومن كل عقلها انها تربح المصاري
    وتحافظ على ترابطها مع اسرتها والمجتمع
    طبعا مستحيل

    دمتِ بخير

    ردحذف
  13. انا مش مستغربة لفكرة البرنامج قد ما مستغربة من مشاركة بعض الناس فية للحصول على بعض المال مقابل خسارة لاعز الناس
    للاسف كلنا خطائين واحيانا جوانا كرة وبغض لبعض الناس
    لكن لا يصح ان نصرح بذلك امام البشر
    اسلوبك دمة خفيف وبسيط فى هذا البوست ضحكت من القلب
    احييك يا يوسف وشكرا لك على الزيارة

    ردحذف
  14. كلامك سليم

    حقيقية اية اللى نبحث عليها وسط ركام الجراح والالم ومشاهدة الاخرين لنا ونحن نبتسم ونتالم

    بوست رائع

    تسلم علية

    مع خالص تحياتى

    ردحذف
  15. أنا حضرت النسخة الأجنبية والعربية. بكلا النسختين قول الحقيقة قد يكون له نتائج وخيمة على صاحبه، من ناحية الأسرة أحيانا ومن ناحية العمل. بس في فرق إنه الاجانب العلاقات عندهم مفتوحة فممكن يعترفوا باخطاء لو عنا اعترفوا الاشخاص بمتلها فهذا يعني خراب بيوت ويمكن حتى دم للركب! بس بصراحة أنا بقول ما دام المشترك وضعع نفسه بهذا المكان فيتحمل! أنا عن نفسي مستحييل أفكر أشترك بهيك برنامج لأنه بهدلة أكيدة!

    ردحذف
  16. مشكلتنا انا بنحب التقليد بكل شي و الابداع عنا ابدا مش موجود

    اشي صالح او غير صالح لمجتمعنا و لعاداتنا مش مهم, المهم نقلد

    نيجي للمضمون اللي كتبته.... على راي نيسانة المدونين " تحشييييش" يعني كأني شايفة الحلقة قدامي و شايفة خالتو الحجه و هي مبسوطه على الاجوبة اللي عجبتها و شايفه النظرات المتبادله بين الكل :)

    هالبرنامج هو فضيحه كبيره, ابسط سؤال ممكن يكون اله 100 معنى و كل معنى بخرب اكتر من اللي قبله

    ان شاء الله يجي اليوم اللي نشوف برنامج مناسب النا و بفكره جديده مش نسخه معرّبة طبق الاصل

    ردحذف
  17. ويسبر

    معلش اسمحولي ابلش مع صديقتي ويسبر

    مساء الخير

    شايفة قديش نفسي طويل

    قررت ان لا انزل ادراجا جديدا الا لما اشوف تعليق منك او من صديقنا صالح

    ليش.....؟؟؟
    ما بعرف بس هيك كنت انتظر وجود احدكما هنا قبل ان اكتب من جديد

    على كلِ هذا من محبتي لوجودك الدائم انتِ وصالح باشا

    بعدين خالتو الحجة الله يطول في عمرها ...
    ما شاء الله عليها بتعجبك...!!!

    الله يرضى عليكِ ويسعدك
    ودمتِ بخير

    وبما انني ذكرت صديقنا صالح بالخير...
    حبيت امسي عليه من هون

    مساء الخير

    ردحذف
  18. رنا الشعباني

    مساء الخير

    اتفق معك في كل ما قلتيه

    الله يرضى عليكِ ويسعدك

    واشكرك على وجودك ومرورك

    دمتِ بخير

    ردحذف
  19. تامر نبيل موسى

    مساء الخير

    اولا يشرفني مرورك واضافتك لمدونتي عندك

    واهلا وسهلا بك

    دمت بخير

    ردحذف
  20. هبة فاروق

    مساء الفل

    والله اشتقنالك كاتبة ومعلقة

    وحقيقي انتِ وكارولين لما غبتوا

    الكل حس انه البلوغر في شيء ناقص

    الله يرضى عليكِ ويسعدك

    والحمد لله على السلامة كمان مرة

    دمتِ بخير

    ردحذف
  21. اولا بعتذر عالتأخير....مش فاهمه ليش مش عارفه ازبط وقتي منيح هاد وانا لسا بفترة دوام التدريب و بكره الدوام بصير اطول...ان شاء الله مع الوقت بزبط ولكن انا بقرأ اول باول كل شي و لكن بتأخر بالتعليق لحتى اقرأ وما يروح علي شي

    ثانيا شكرا على كلامك الاكثر من رائع ...الله يسعد كل اوقاتك زي ما اسعدتني بتعليقك
    وشكرا لوضعي بنفس القدر مع صديقنا صالح اللي دائما تعليقاته بتعجبني و بكون بليغ جدا بكل كلمه بكتبها و بتكون صايبه الهدف و عالوجع بالزبط بغض النظر عن محبته لكرسي الاعتراض دائما :)

    ردحذف
  22. ولا يهمك ان شاء الله بتتعودي على الشغل والحياة وامورك دائما بتكون عال العال

    لا تنسي انكِ ذكرتِ ...صالح في تعليقك الاول
    فكان لزاما ان نذكره بالخير
    ونمسي عليه

    وزيّ ما لاحظتي كل التعليقات ما كان فيها معارضة
    يعني وجوده كان ضروري
    ههههه

    مساء الفل والياسمين

    ردحذف
  23. أبو عمر باشا و ويسبر هانم، الله يمسيكم و يصبحكم دائماً بكل الخير يارب، و شكراً على تذكري، هاليومين بأحاول أتابع إللي بتكتبوه على قدر الإمكان، و إن شاء الله باقدر أتواصل معكم أكثر عن قريب.

    الله ييسر لكم أموركم كلكم و ييسرلي أموري معاكم.

    ردحذف
  24. صالح

    اخي وصديقي

    يعطيك العافية ...
    انا مرات كثيرة بنشغل ....اكيد يقرأ للجميع ولكن التعليق يحتاج لتركيز وفضاوة احيانا لا تتوفر
    وانا ادرك انك دائما معنا وان كانت ظروف العمل والحياة تبعد تعليقاتك او تؤخرها احيانا
    ولكنك دائما معنا
    وربنا يديم المحبة

    من محبتنا كتبنا
    لاننا نشتاق لوجودك معنا دوما

    دمت بخير

    ردحذف